„EF VÆNDISKAUPENDUR MEGA VERA NAFNLAUSIR, AF HVERJU ÞARF FÓLK SEM GAGNRÝNIR AÐ LÖGUM SÉ EKKI FRAMFYLGT AÐ KOMA FRAM UNDIR NAFNI?“

Posted on ágúst 30, 2012

0


19. JÚNÍ LAGÐI NOKKRAR SPURNINGAR FYRIR STÓRU SYSTUR

Vitið þið til þess að lögreglan hafi nýtt sér þau gögn sem þið færðuð þeim um karla sem hafa reynt að kaupa vændi?

Við vitum ekki til þess að lögreglan hafi nýtt sér gögnin. Aftur á móti hófu lögreglan og Fréttablaðið samstarf og Fréttablaðið útbjó nýjar vinnureglur til að nota við móttöku smáauglýsinga sem auglýsa nuddþjónustu. Því miður virðist samstarfið aðeins hafa haft skammvinnan árangur, því auglýsingarnar hurfu aðeins um tíma.

Það má segja að við höfum orðið fyrir vonbrigðum með viðbrögð lögreglunnar. Eins og málum er háttað eru mál er varða vændi og mansal undir sama hatti hjá lögreglunni og nauðganir og kynferðisbrot almennt. Bæði skortir fé og mannafla í þennan málaflokk og ekkert virðist eftir þegar kemur að vændi og mansali sem virðist stundað hér án mikillar hættu á afskiptum lögreglu.

Stóra systir hefur ekki verið í beinum samskiptum við lögregluna nema þegar gögnin voru afhent í haust.

Hvernig hafa viðbrögðin í samfélaginu við aðgerðum ykkar verið?

Almennt hafa viðbrögðin verið mjög góð. Við höfum fengið mörg þakkarbréf og hvatningu hjá fólki. Auðvitað er einhver hópur sem hefur eytt miklu púðri í að tala um aðferðafræði Stóru systur og umræðuna hefur því, eins og oft vill verða í netheimum, borið af þeirri leið sem okkur hefði þótt æskilegust, það er að fjalla um raunverulega stöðu vændis og mansals hér á landi. Það kom okkur verulega á óvart hvað framboð og eftirspurn er mikil.

Annað sem kemur alltaf upp í svona umræðu er að þeir sem berjast gegn því ofbeldi sem vændi og mansal er eru sakaðir um tepruskap og siðapredikanir. Þetta er grundvallarmisskilningur. Í fyrsta lagi lítum við svo á að kynlíf komi hvergi við sögu þegar ein manneskja kaupir aðgang að líkama annarrar manneskju heldur á sér þá stað alvarlegt ofbeldi. Ein manneskja kaupir sér vald yfir annarri og við það skapast valdaójafnvægi sem brýtur á mannréttindum þeirrar manneskju sem keypt hefur verið vald yfir.

Varðandi siðaboðskapinn er það þannig að það er bannað með lögum á Íslandi að kaupa vændi. Lagasetningar byggja að sjálfsögðu á siðferðilegum grunni, enda eru þær tæki til að skapa siðað samfélag.

Af hverju felið þið ykkur?

Við teljum ekki að við séum að fela okkur. Nafn- og andlitsleysið hefur margþættan tilgang.

Í fyrsta lagi þá er það bragð gegn þeirri íslensku hefð að fara í manninn en ekki boltann, eða svokölluð „argumentum ad hominem“ –aðferð. Það skiptir engu máli hverjar við erum, það sem skiptir máli er það sem við viljum vekja athygli á; hér virðist auðvelt að kaupa vændi þrátt fyrir góð og skýr lög gegn því.

Í öðru lagi þá er sá hópur sem stendur fyrir vændi beinlínis hættulegur og rekstur vændis og mansals er nátengdur skipulögðum glæpasamtökum. Sá hópur notar ekki „argumentum“ heldur gengur skrefinu lengra en „ad hominem“ –hópurinn. Þótt við sjálfar séum tilbúnar að leggja okkur í slíka hættu þurfum við að hugsa um fjölskyldur okkar í því sambandi.

Í þriðja lagi þá er þetta háðsádeila á það hversu mikla vernd vændiskaupendur hafa fengið í réttarkerfinu. Ef vændiskaupendur mega vera nafnlausir, af hverju þarf fólk sem gagnrýnir að lögum sé ekki framfylgt að koma fram undir nafni?

Hvað er næst á dagskránni í baráttu Stóru systur gegn vændiskaupum?

Stóra systir er ekki með langtímaáætlanir en við erum ekki hættar og ef við fáum góðar hugmyndir erum við ekki lengi að hrinda þeim í framkvæmd.

Ætlið þið að birta listann sem þið afhentuð lögreglunni?

Það kemur í ljós 🙂

Viðtalið birtist í 19. júní, ársriti kvenréttindafélagsins 2012

Auglýsingar
Posted in: Greinar